هدى: ما بيحبنيش أروح عند جارتي

أقامت«هدى»، ربة منزل، دعوى قضائية أمام محكمة الأسرة بالتجمع الخامس في القاهرة الجديدة، طالبت فيها بالخلع من زوجها «حسين»، بعدما شعرت باستحالة العشرة بينهما، قائلة: "ما بيحبنيش أروح عند جارتي، حسين اللي اتجوزته، مش هو اللي حبيته".

وتابعت: "أنا ما كنتش أعرفه قبل ما يطلبني من بابا، ولما وافقوا عليه في البيت، اتخطبنا سنتين، حبيت حنيته وطيبة قلبه علقوني بيه، ما كنش بيرفضلي طلب، واتمنيت يجمعنا بيت واحد عشان أعرف أسعده".

وأكملت كلامها، بحزن جال بخاطرها فور تذكرها لشيء ما: "من أول يوم اتجوزنا فيه وهو متغير معايا، بطل يهتم بيا، وبيغيب في شغله كتير، ساعات قليلة اللي بيقعدها في البيت، ولو جه بدري ينزل يقعد مع صحابه ويسيبني، أنا مليت وكل ما أتكلم معاه، يزعقلي ويقولي دي حياتي ولو كان عاجبك".

وأضافت: "تعرفت على جارتي في نفس العمارة، وبقيت اقضي معاها اليوم طول ما حسين في الشغل، ما كملناش سنة متجوزين وسايبني لوحدي، ولما بلجألها واحكيلها تيجي في شقتي وأروحلها أحيانا، جوزها ظروف شغله بتخليه يغيب كتير، وحاسيت إننا مالناش إلا بعض، وبنهون على بعض، جه مرتين ويلاقيها عندي في البيت، ويتضايق، وقالي لا هي تيجي ولا أنا أروحلها، عايز يجنني ويخليني أكلم الحيطان".

وأكدة «هدى»، أنها حاولت كثيرا أن تجعل حياتهما مستقرة، لكنها فشلت في الاستحواذ على اهتمامه  أو الجلوس معها أكثر، مشيرة إلى أنها طلبت منه الانفصال لكنه رفض، فقررت رفع دعوى خلع منه بمحكمة الأسرة، والعودة لبيت أبيها في بولاق الدكرور مرة أخرى.